الأمن لازم يربع إيديه ويعمل أدب

حبلص يحبلص فهو ظابط
طب تصدقوا الاسم لايق عليهم
حلبص الداخلية المريييييع الفظيييييع الراجل أوي

الأستاذ الحبلص اللي الثورة قضت تقريبا على آماله العريضة في أنه يدوس على رقاب الخلق.. حاسس باضطهاد
وبيقول كلام أبيح مما يدل على أن الأباحة مادة مهمة جدًا في كليات الشرطة.. والظاهر أنه مثالي في المادة دي
طب ده لسة طالب.. أى نعم هو مثالي في الأباحة بس برضه طالب.. أمال الحباليص الرتب بأة نظامهم إيه
]ده كلام واحد رتبة بأة.. عايز البلد تولع بينا كلنا.. شاعري أوي الحبلص ده

خد عندك كمان يا سيدي الشعب العظيم المسالم
مقتل طالب وإصابة صديقه بعد إعتداء مخبرين عليهم بـ"الشوم" في الفيوم 
طبعا المخبرين ربنا يخليهم ويعمر بيتهم كانوا فاكرين الطلاب من أعضاء الثورة قصدي (أعداء الثورة) فقاموا مخلصين على طول
أكتر ناس بيحبوا البلد دي همة المخبرين ماشيين بطريقة فعالة جدا بتؤكد إن الزيادة السكانية اللي كانت مدوخة الحكومة ليها حل عبقري
وبدأوا فعلا في بناء البلد بالتخلص من الزيادة دي. وزى ما أنتو شايفين الموضوع سهل جدا أهو

ده بأة موضوع قسم الأزبكية.. السواق إدي بضهر إيده المأمور على وشه.. فالناس اتجننت إزاى سواق زميلهم في الموقف من سنين يضرب البيه المأمور
قاموا قتلوا السواق زميلهم علشان خاطر كرامة المأمور.. أتاري بأة المأمور كان عايز ينقذه بس الناس حلفت بالطلاق لا ممكن أبدًا 
أمال ليه الحباليص بيقولوا الشعب مش بيساعدهم.. وإنهم بيتعدوا عليهم بالضرب لما ييجوا يقبضوا على حد انتقاما من الداخلية
هو في شعبين في مصر واحنا منعرفش
سؤال برئ معلش .. هو المأمير بتوع الأقسام بيشتغلوا في تنظيم المرور.. بيساعدوا زمايلهم يعني ولا بيحسنوا الدخل
المأمور بتاع المرور اللي إتلطش قلم على وشه

أهل المتوفي اقتنعوا إن ابنهم يستاهل القتل.. الله يحظهم الحباليص دمهم شربات

قسم مدينة نصر يحتجز محرراً بـ«المصري اليوم» ويتركه ينزف ٣ ساعات قبل تحويله للمستشفى 

(بيقولك الظابط لما عرف إنه مراسل قاله (إنت بقى المرصفاوى.. منور.. إنت متهم بالشروع فى قتل الطلاب والاعتداء عليهم).

 ضابط يعتدي علي فتاة ويحيلها للعسكرية

ألا إيه هى تهمة سب ظابط شرطة دي.. يعني هو وقفها علشان السرعة الزيادة اللي كانت سايقة بيها.. ياخدها القسم ويحقق معاها بتهمة سب ظابط شرطة.. بس بصراحة هو على استعداد يقبل الصلح بس البنت تطلع في القنوات الفضائية تعذرله على الهواء مباشرة بث حى

يعني هو أحسن من اللي بيطلع اسمهم في التليفزيون

لازم نعمل قاعدة فيس بوك أون لاين وندبح كام أكونت ابتهاجا بقبول الاعتذار

ومن موقعي هذا أحب أقدم نداء لكل حبلص أو حبلوص صغير.. إتلهوا

محمد شمس

طالب صيدلة.. اعترضت طريقه سيارة ملاكي..  وعندما حاول محمد الرجوع بسيارته أطلق عليه صاحب السيارة النار وأصابه في عينه

تبين أنه الرائد وائل الحيوي الذي قام بتلفيق قضية مخدرات لشمس

إثبات براءة شمس

الظابط اتحول للتحقيق بتهمة الشروع في القتل وتلفيق التهم.. المهم مايطلعش بعد كام يوم ويترقي نظرا لدوره العظيم في القضاء على النسل هو كمان

طبعا كل ده حصل بعد الثورة .. ده غير حالات التعذيب في الأقسام

طب إيه الحل في داخلية تتلذذ بالتعذيب والقتل وتتخذه أسلوب حياة.. ومحدش يقوللي الظباط الشرفاء وبتاع.. لو همة شرفاء يتفضلوا يورونا نفسم وياخدوا موقف محترم شريف برفض جرائم تتم أمام أعينهم..

وعموما كون أنهم ملهومش صوت فده يدل على أنهم أقليات واحتمال يطلبوا حماية دولية همة كمان

نفسية الطالب اللي بيدخل كلية الشرطة إزاى بتتحول في 4 سنوات إلى هذه النفسية المعقدة المعادية للمجتمع.. أصلا هو داخل كلية الشرطة ليه؟؟

ح نكون حياديين ونعترف إن عمل الشرطة مش مجزي ماديًا فعلا.. يعني همة في الآخر موظفين يعني لو عاش شريف ح يشحت ده أولا

ثانيًا عدد ساعات العمل كتيرة جدا.. يعني اللي ح يشتغل بجد ح يكون شغل بهدلة

يبقى أصلا اللي داخل كلية الشرطة منشن على حاجة تانية.. يعني داخلين وهمة عارفين هدفهم.. سلطة يدوس بيها الخلق.. ويتحول عيل عنده 21 سنة إلى سعادة الباشا.. السلطة الممنوحة لواحد في هذا العمر كفيلة بتحويله إلى وحش يسعى للحفاظ على هذه الهالة المعنوية الجبارة

وبرضه بيعرفوا يقلبوا عيشهم..

ده غير أنه أصلا ح تلاقي أبوه ولا عمه ظابط علشان محدش بيدخل من غير واسطة فمتربي أصلا على إيدين ظابط عنده نفس النفسية.. دائرة مغلقة لابد من كسرها 

كبعا في ظباط بيتحاكموا بتهمة قتل المتظاهرين اللي فقدت معناها من كتر ما سمعنا عنها من غير مانشوف نتيجة.. لكن اللي بيحصل إن الظابط من دول يطلع من قفص الاتهام على شغله في القسم.. عمار يا مصر يا أم البدع

أخطبوط الأمن بعد الثورة بدل ما درعاته تتقطع بتزيد.. والظاهرإن الأخطبوط والداخلية إيد واحدة

الأمن ده لازم يتعلم يربع إيديه ويعمل أدب.. الثورة كانت بسببكم أصلا.. بس الظاهر إنكم ماتعلمتوش..

ومن الآخر إحنا مش عايزينكم.. ماأنتوا أصلا بطالة مقنعة دلوقتي.. يعني الاسم نازلين الشغل لكن في تناحة على رأى واحد صحفي

يعني بتقبضوا فلوس ومن غير شغل..

بس الشهادة لله مركزين أوي على المرور.. الظاهر فيها سبوبة حلوة
في النهاية.. كنت ناوية أكتب الموضوع بالفصحى. بس ماركبتش عليهم

أحلى تحية لأبو دبورة وشورت وكاب

دعوة للكراهية

أعترف إنني من جيل لم يتعلم كراهية إسرائيل بما يكفي
حيث عشت عصر مبارك الذي تحول فيه العدو الإسرائيلي إلى دولة إسرائيل الصديقة
لم نسمع عن الهجوم على القوات المعادية ولكن سمعنا عن التطبيع
لم نسمع عن الجهاد من أجل تحرير القدس ولكن رأينا الجدار العازل يعزلنا عنها
حيث تم طمس الحقائق للمصالح
دعونا نتعلم كيف نكره أؤلئك القوم.. كيف نقاوم المشاعر المحايدة التي تقف حائلا أمام المشاعر البديهية بكراهيتهم
هم أدنى من أن يكونوا بشر.. فطروا على غير ما فطر عليه الناس
العدو الإسرائيلي..
دير ياسين
دير ياسين كانت قرية فلسطينية  تقع غربي القدس دخلها اليهود يوم9  إبريل سنة 1948 وأقاموا فيها مذبحة بشعة بقيادة مناحم بيجين الذي اقتسم مع السادات جائزة نوبل حيث ذبحوا من أهلها 93 شخصا بين رجل وامرأة وشيخ وطفل ومثلوا بجثثهم بشكل بشع بقطع للآذان وتقطيع للأعضاء وبقر لبطون النساء والقوا بالاطفال في الافران المشتعله وحصد الرصاص كل الرجال ثم ألقوا بالجميع في بئر القرية،
إستوطن اليهود القرية وفي عام 1980 أعاد اليهود البناء في القرية فوق أنقاض المباني الأصلية وأسموا الشوارع بأسماء مقاتلين الإرجون  الذين نفّذوا المذبحة.
من تفاصيل المذبحه السيده التي كانت على وشك الولاده التي دخلوا اليها فشقوا بطنها بالسونكى على هيئه صليب واخرجوااحشاءها وطفلها وذبحوه وقطعوا ثدييها ووضعوه في بطنها مع طفلها مره أخرى

صابرا وشاتيلا
مذبحة صبرا وشاتيلا هي مذبحة نفذت في مخيمي صبرا وشاتيلا لللاجئين الفلسطينيين في 16 أيلول 1982 واستمرت لمدة ثلاثة أيام على يد المجموعات الانعزالية اللبنانية المتمثلة بالقوات اللبنانية الجناح العسكري لحزب الكتائب اللبناني في حينها و الجيش الإسرائيلي. عدد القتلى في المذبحة لا يعرف بوضوح وتتراوح التقديرات بين 3500 و5000 قتيل من الرجال والأطفال والنساء والشيوخ المدنيين العزل من السلاح، أغلبيتهم من الفلسطينيين ولكن من بينهم لبنانيين أيضا. في ذلك الوقت كان المخيم مطوق بالكامل من قبل الجيش الإسرائيلي الذي كان تحت قيادة ارئيل شارون ورافائيل أيتان أما قيادة القوات المحتله فكانت تحت إمرة المدعو إيلي حبيقة المسؤول الكتائبي المتنفذ. وقامت القوات الانعزالية بالدخول إلى المخيم وبدأت بدم بارد تنفيذ المجزرة التي هزت العالم ودونما رحمة وبعيدا عن الإعلام وكانت قد استخدمت الأسلحة البيضاء وغيرها في عمليات التصفية لسكان المخيم العزل وكانت مهمة الجيش الإسرائيلي محاصرة المخيم وإنارته ليلا بالقنابل المضيئة 

 
مجزرة قانا
هجوم قانا الأول في 18 أبريل 1996 تمت في مركز قيادة فيجي التابع ليونيفل في قرية قانا جنوب لبنان، حيث قامت قوات الاحتلال الإسرائيلي بقصف المقر بعد لجوء المدنيين إليه هربا من عملية عناقيد الغضب التي شنتها إسرائيل على لبنان، أدى قصف المقر إلى مقتل 106 من المدنيين وإصابة الكثير بجروح. وقد اجتمع أعضاء مجلس الأمن للتصويت على قرار يدين إسرائيل ولكن الولايات المتحدة أجهضت القرار باستخدام حق النقض الفيتو.

مذبحة بحر البقر
مجزرة بحر البقر هي عملية إرهابية قامت بها القوات الجوية الإسرائيلية حيث قصفت مدرسة بحر البقر المشتركة في قرية بحر البقربمركز الحسينية بمحافظة الشرقية في مصر، حدثت في 8 أبريل 1970 م، وأدت إلى مقتل 30 طفلا وأصابة 50.
جاءت هذه المجزرة استكمالا لسلسلة المجازر التي ارتكبتها إسرائيل آنذاك بالدول العربية المجاورة.

 محمد الدرة
الانتفاضة الفلسطينية.. 

لن يعبر كل هذا عن جرائم إسرائيل.. لن يعبر أبدًا عما يجب أن نشعر به تجاههم
ربما يعبر عن استسلامنا للأمر الواقع
أن تلكم المشاهد أصبحت جزءًا من حياتنا اليومية ألفناها كما نألف ضعفنا.. وكما نألف خوفنا.. وكما نألف السلام المبرم بيننا
عندما يقطع بلطجي عليك الطريق يوميًا.. يسرقك.. يضربك.. يمزق ملابسك ويبعثر كرامتك.. لكنك تصر على محاولتك في التقرب منه وإيجاد الحل الذي يضمن عدم إذائك
ماذا يفعل هذا البلطجي أكثر من هذا ليثبت لك أنه بلطجي
ليثبت أنه لن يرتدع مادمت ساكتًا ووادعًا
السلام.. لكم كرهنا هذه الكلمة لأنها ارتبطت بهم.. وأى مفارقة محزنة، أى مفارقة أن ترتبط كلمة سلام بإرهابيي العالم 
ليست تدوينتي سوى توثيق لبعض فظائعهم
سوى محاولة لكراهيتهم أكثر.. ربما تكون الكراهية سببًا في الغضب بما يكفي
ربما محاولة لنعلم أن الحياة ليست بهذه الروعة وسط صرخات نصم عنها أذاننا
أن تمزيق وتقطيع الأوصال البشرية هو أسلوب حياة
أن أطفالنا دمى بشرية وبشريتنا كعرب هى موضع شك
نحن حشرات يجب وطئها ليعيش السادة
هل يجب أن نتخلص من الضعف أم من التخاذل أم من إحساسنا بالدونية
ثمة شعور أراه أحيانًا أننا لا نأبه لما يحدث لأننا في دواخلنا نشعر بالدونية وبأننا نستحق ما نلقاه
ثمة حيلة نلعبها لنشعر بأننا رائعون.. (هم يستحقون هذا لقد باعوا الأرض)
أما نحن فرائعون نتغنى دوماً (عواد باع أرضه)
ناسين أننا بعنا العرض بتخاذلنا وبسلامنا الهزلي.. وأن جزءًا مما حدث يقع على عاتق ضعفنا وخيانة بعضنا
وها قد بيعت أرض مصر.. إذن نحن نستحق أن تسحقنا المدرعات ويجب أن يكون لنا نصيب من المذابح!!!
ثمة حيلة أخرى هى أن (لو كان الجميع جلس في كامب ديفيد لأخذوا أرضهم مثلنا)
ناسين أن كامب ديفيد نفسها عار يجب أن نكفر عنه طيلة حياتنا
العدو الإسرائيلي يجب أن يظل عدوًا.. يجب أن نتحرر من زمن كان التطبيع فيه هو اسم اللعبة
إذا كان السلام سيجلب لنا صديًقا من عينة هؤلاء القوم.. فتبًا لهكذا سلام
ابحثوا عن صور المذابح.. اعتبروه واجبًا يوميًا.. إذا لم نستطع أن نفعل شيئًا الآن فعلى الأقل وثقوا فظائعهم في الأذهان.. وانصروا الضحايا بالكراهية.

حوار,, كلاكيت تاني مرة

يا حواراتك
أمال الحوار اللي فات اللي كان اسمه وطني ده كان فيه مين بالظبط؟
ولا دي لجنة خاصة؟
إمممممممم ألف شاب من شباب الثورة من 100 ائتلاف.. دي الثورة كانت ولادة بجد
100 ائتلاف.. هذا يذكرني بأزمة السكان.. انفجار سكاني وانفجار ثوري
(ويهيب المجلس الأعلى بشباب الثورة توحيد الصفوف وسرعة اختيار العناصر التي تمثله) واحقاقًا للسرعة اللي المجلس بيقول عليها فهو عمل اللي عليه علشان الشباب ينجزوا بسرعة.. اللقاء بعد الإعلان بيومين


الحوار ابتدا أهو:
(يذكر أنه لم يسمح للشباب المدعوين بتوجيه اسئلة مباشرة الي اعضاء المجلس وطلبوا اليهم ارسال الاسئلة مكتوبة)
(وحدثت عدة مقاطعات من القاعة تحدثت عن ضرورة وقف المحاكمات العسكرية وأن يكون الدستور أولا وطالبت بنتائج التحقيق في وقائع فض الاعتصام في مارس والتحقيق في احداث السفارة الا انها قوبلت بموجة غاضبة من شباب الاخوان والسلفيين الذين هتفوا في وجه المتحدث " برة برة) يا عينى .. أمال فين الإخوان من دعم القضية الفلسطينية..
المصدر 

الويك ويك كان كتير جدا الحوار ده.. ائتلافات الثورة أعلنت انسحابها منه.. على الرغم من أن المعلن يقول إن هناك 153 ائتلاف شارك في الحوار
المصدر
بيان ائتلاف الثورة
مفيش كلام جديد يتقال
لكن سؤال.. هل ما يتم الاتفاق عليه في هذا الحوار (أيوة أيوة عارفة إن الموجودين اخوان ووطني بس بأزنقهم) سيكون ملزمًا للمجلس.. هل المجلس سيأخذ التوصيات في نهاية الحوار في الاعتبار
أم أن هذا الحوار هو تنفيس وفضفضة وخلاص
وفي النهاية قاموا مشكورين بعمل أوفين بونيه يوووووووه قصدي أوبن بوفيه
وخلي الثورة تاكل يا ولاد

والفاجومي قالك زمان (هنا شقلبان محطة إذاعة حلاوة زمان)
وكانت وليمه
ماتحصلش تاني
دا ايه المحمر
وايه المكمر
وايه المشمر
وايه الصواني
وأنا دماغي تعبت
ولفت صراحه
من الفخفخه
والهنا الأصفهاني
هناك يعني مثلا
اذا شربت طافيه
تمز بكوارع
وبسطرمه ضاني

وقفة قبل الدستور

الدستور عند المجلس العسكري مسألة حياة أو موت

تناثرت كلمات عن أن محاولات المجلس لاستقطاب جماعة الاخوان المسلمين تهدف إلى

أن يكون أغلبية مجلس الشعب من الإخوان وبالتالي يشكل هذا المجلس هيئة تأسيسية لوضع دستور للبلاد

فما السبب؟ وما الذي يضير المجلس العسكري من أن يتم وضع الدستور قبل الانتخابات خاصة مع وجود دستور فعلا هو دستور 1954 ولا يحتاج إلا إلى مجرد تعديلات بسيطة

قيل أن السبب هو أن يتم وضع مادة في الدستور الجديد تؤكد على (استقلال القوات المسلحة) أى ألا يكون رئيس الجمهورية هو القائد الأعلى القوات المسلحة

وعلى الرغم من ان البعض يرى منطقية مادة كهذه إلا أن الوضع يختلف في أن هذه المادة ستكون لحماية مصالح المجلس العسكري

إذا تم انتخاب رئيس مدني يكون هو القائد الأعلى للقوات المسلحة فاحتمالات تغيير قيادات هذا المجلس واردة جدًا خصوصًا مع ضغط شعبي قد يتنامي على أساس أن هذا المجلس مع وزير الدفاع هم جزء من النظام السابق.. لا يمكن إسقاطهم الآن لكن إسقاطهم سيكون أمرًا مفروغًا منه بعد استقرار الدولة وتسليم السلطة لرئيس منتخب يعبر عن الشعب

من الآخر هذه مصالح جنرالات الجيش.. الذين يديرون مصانع الإنتاج  الحربي بما يعادل 25% من حجم الاقتصاد المصري

وبما لهم من علاقات مع النظام السابق ستكون احتمالات كشفها مجرد وقت..

ما الحل إذن؟

النخبة مشغولة بمكلمة لا يسمعها أحد.. لا الشعب ولا الجيش

والكل مشغول بفرض أيدلوجيات بغض النظر عن المجتمع وقيمه.. النخبة تخسر الشارع والمجلس الأعلى

والإخوان بدأوا نعم في خسارة الشارع لكن عددهم قد يعوض هذه الخسارة وأيضًا يكسبون المجلس العسكري

ولا يوجد أى ضامن أو ضمان من سير العملية الانتخابية كما يجب.. خصوصًا مع الانفلات الأمني الذي أعتقد بشدة أنه مقصود.. سيبوكوا من الداخلية .. لكن ما هو مش ممكن جيش يحمي الحدود ويأمن البلد من الأخطار الخارجية  غير قادر على تأمين شوارع البلد من مجموعة من الغوغاء ومثيري الشغب

نظام الانتخاب بالقائمة النسبية والنظام  الفردي بنسبة 1 إلى 3 واقعة تستحق التوقف عندها

هل السبب أن القائمة النسبية قد تسبب مشكلات بالنسبة للأخوان المسلمين الذين يجيدون التعامل مع النظام الفردي أكثر من حيث استقطاب الناس عن طريق الخدمات والخطاب الديني

هذا هو رأى  الإخوان (على الجانب الآخر، رحب الدكتور حمدى حسن، القيادى بجماعة الإخوان المسلمين، بعرض المجلس العسكرى مشروع القانون للتشاور رغم اعتراضه الشديد على اللجنة، وأبدى حسن رفضه لإجراء الانتخابات بنظام القائمة النسبية والفردى لصعوبة تطبيقها على أرض الواقع، مؤكدا أنه كان لزاما على المجلس العسكرى أن يجرى الانتخابات البرلمانية بنفس الطريقة السابقة وهى الفردى احتراما للمبادئ التى نهجها من قبل والمتمثلة فى عدم اتخاذ أى قرارات بتغييرات فى الأمور المصيرية مثل نسبة الكوتة ونسبة الـ 50% عمال وفلاحين، وأن يتركها للبرلمان القادم.

http://www.youm7.com/News.asp?NewsID=422650&SecID=12)

ماذا يقول وزير العدل؟

(من جهة أخرى، أكد المستشار محمد عبدالعزيز الجندى، وزير العدل، خلال ندوة مع أعضاء نادى الجزيرة، مساء أمس الأول، أن الحكومة لا تمانع فى تأجيل الانتخابات البرلمانية المقبلة، بشرط وجود إجماع شعبى على هذا الشأن، وقال: «لو كان هناك إجماع شعبى على تأجيل الانتخابات البرلمانية فإن الحكومة ستنفذ تلك الإرادة، انطلاقاً من كونها حكومة الشعب)

http://www.almasry-alyoum.com/article2.aspx?ArticleID=298587

إذن هناك اتجاهًا في حكومة الثورة لتأجيل الانتخابات لعمل دستور جديد

نعود للرد على من سيقول إن هذا التفاف على نتيجة الاستفتاء:

أولا: الاستفتاء كان على دستور 71 وعلى تعديل بعض مواده

فئة صوتت بنعم نتيجة استنفار الشيوخ في الدفاع عن المادة الثانية من الدستور

وأخرى للاستقرار على أساس أن الدستور هو حامي البلاد وجبهتها الداخلية

وأخرى صوتت بنعم اعتقادا أن هذا سيسرع من رجوع الجيش لثكناته وتسليم السلطة

لكن لو علمنا أن السيناريو القادم سيحتاج إلى إطالة الفترة الانتقالية فما الرد؟

إذا تمت الانتخابات أولا:

1.     انتخابات برلمان.

2.     جمعية تأسيسية لوضع دستور جديد.

3.     الاستفتاء على الدستور.

4.     حل البرلمان وعمل انتخابات برلمانية جديدة.

5.     انتخابات رئاسية.

إذا تم وضع الدستور أولا:

1.     جمعية تأسيسية لوضع دستور.

2.     استفتاء على الدستور.

3.     انتخابات برلمانية.

4.     انتخابات رئاسية.

إذن نحن أمام تدليس واضح بأن الانتخابات أولا ستسرع من تسليم السلطة.

وستكون الفترة أقل كثيرًا لو تم تفعيل دستور 54

بالنسبة لموضوع التفاف على إرادة الشعب.. الشعب وافق على التعديلات.. أى أصبحت المواد المستفتى عليها غير قابلة للتعديل بأى شكل من الأشكال..

المادة رقم 189 في التعديلات الدستورية التي وافق عليها أغلبية الشعب نصها كالآتي:

(و لكل من رئيس الجمهورية و بعد موافقة مجلس الوزراء و نصف أعضاء مجلسي الشعب و الشورى طلب إصدار دستور جديد و تتولى جمعية تأسيسية من مائة عضو ينتخبهم أغلبية أعضاء المجلسين غير المعينين في اجتماع مشترك إعداد مشروع الدستور في موعد غايته ستة أشهر من تاريخ تشكيلها و يعرض رئيس الجمهورية المشروع خلال خمس عشرة يوما من إعداده على الشعب لاستفتائه في شانه و يعمل بالدستور من تاريخ إعلان موافقة الشعب عليه في الاستفتاء).

حسنًا.. هذه هى نفسها المادة 60 في الإعلان الدستوري:

(يجتمع الأعضاء غير المعينين لأول مجلسي شعب وشورى في اجتماع مشترك، بدعوة من المجلس الأعلى للقوات المسلحة، خلال ستة أشهر من انتخابهم، لانتخاب جمعية تأسيسية من مائة عضو، تتولى إعداد مشروع دستور جديد للبلاد في موعد غايته ستة أشهر من تاريخ تشكيلها، ويُعرض المشروع، خلال خمسة عشر يوماً من إعداده، على الشعب لاستفتائه في شأنه، ويعمل بالدستور من تاريخ إعلان موافقة الشعب عليه في الاستفتاء)

لاحظ تغيير المادة التي تم الاستفتاء عليها وموافقة الشعب عليها حيث تم استبدال الرئيس بالمجلس الأعلى للقوات المسلحة

هذا هو أول التفاف على نتيجة الاستفتاء لكل من يكيل الاتهامات لنا ولمن يريد وضع الدستور أولا

غير أن هذا يعني أن القوات المسلحة ستبقى لحين انتخاب رئيس للجمهورية مع ممارسة اختصاصاته.

هل نحن أمام صفقة تضع مصلحة الجماعة والجنرالات فوق مصلحة مصر في فترة حرجة سترسم الخريطة السياسية للبلاد لعقود طويلة قادمة؟

هل نحن أمام إرادة شعبية حقًا أم أن هناك من يحترف اللعب على مشاعر الناس و الكلام باسم الشعب؟

لماذا لم يتم تجريم استخدام الدعاية الدينية في الانتخابات في قانون مباشرة الحقوق السياسية؟

لماذا على الرغم من أن قانون الأحزاب يمنع إنشاء حزب على أساس ديني نرى الأحزاب الدينية تتوالى باسم السلفية ؟

لماذا تجرم الاعتصامات والمظاهرات ولا تجرم غزوات محاكم التفتيش لاشعال الفتن الطائفية؟

لماذا الأمن والشرطة العسكرية قادرين على فض المظاهرات وحماية السفارات وإخلاء الميدان وغير قادرين على إعادة الأمن للشارع الذي أصبح مباحًا لكل أنواع الجرائم الجنائية؟

إذا أعطيتني إجابات واضحة لكل هذه الأسئلة فربما أعيد النظر فيما كتبت.

الحوار الوطني.. ويك ويك ويك

الحوار الوطني.. ويك ويك ويك

يا ولول كذا ويا ولول كذا ويا ولول كذا

أنا بحب الحوار وعلى رأى المطرب الوطني في الأغنية الوطنية (بحبك يا حواااااار)
المجلس ربنا يجازيه خير عن حماية الثورة (متضحكش)،  لما لقى الناس مش طمران فيها الصور والدبابات
عملنا حوار وطني ووفاق قومي
أى نعم أنا معرفش الفرق بين الاتنين بس اسم الوفاق الوطني ده يخض
يحسسك كده بمجلس الأمن، الأمم المتحدة، وزارة الداخلية.. حاجة تشرح القلب يعني
الحوار الوطني ده أكيد ح يضم (وطنيين).. الوطنيين مكدبوش خبر.. راحوا حجزوا الكراسي ولزقوا فيها زى عادتهم
الشباب يهشوا فيهم.. أبدًا، يزعقوا معاهم.. أبدًا، تقولش لازم الكراسي تكون تيفال علشان ميلزقوش
الحوار ده بأة المفروض يكون حوار بين طرفين أو أكثر.. ولازم المجلس العسكري الحاكم يكون طرف فيه
أمال إحنا ح نقعد نتكلم مع بعض ولو حصلت المعجزة واتفقنا على مطالب ح نروح بالمطالب دي فيه.. كوالالامبور مثلا
ما هو لازم المجلس يشوف هذه المطالب.. أو يسمعها.. أو حد يقراهاله طيب.. ياخد بيها خبر حتى
ما علينا.. نتكلم وبعدين نبقى نبعت المطالب المتفق عليها (لو حصل واتفقنا) بالإيميل
والمجلس يرد علينا ببيان فيس بوك محترم كالعادة
والله الموفق
هو الحوار شغال بقاله أد إيييييييييه؟ خمس ست أيام
الناس قاعدة .. طالع عينها تتعارك، وتشتم، ويتقطع عليهم البث، ويزعقوا ويصرخوا، يعني حوار حوار يعني
تعب قلب.. يقوم يطلع قرارين من المجلس
الأول: قانون مباشرة الحقوق السياسية

الثاني: قانون انتخابات مجلس الشعب
طب والحوار؟؟
الناس دي شغالة مكلمة.. ولا خرس في بلد طرش؟؟ ولا إيه بالظبط
وعلى رأى بوحة المواطن المصري المطحون (ويك ويك ويك، يا ولول كذا ويا ولول كذا)
ده أنتوا لميتوا معاشات الوزارة والحزب الوطني كله في الحوار.. يعني الشباب ح يحتاجوا يتعالجوا بعد الحوار مايخلص على نفقة الدولة
ولا هو حرق دم على الفاضي
يا مجلس.. يا مجلس.. يا مجلس أنا بأكتب وأنا بأدوس على ضروسي.. أنتوا بتحموا الثورة بنَص كلامكم.. مش بتقودوا الثورة ولا بتحكموا الثورة
دي مش يوليو.. دي يناير
الفرق هو كالفرق بين الأرض والسما، بين البركة والمحيط، بين الصحرا والمرج
ده حتى يوليو كان فيه قرارات ثورية.. 
الحوار الوطني ولا الوفاق القومي، ولا البدنجان المقلي لازمته إيه؟
يعني نضرب دماغنا في حيطة.. أنتوا مش قلتوا مش ح تحموا المظاهرات وإحنا نحمي نفسنا لأننا شباب الثورة العظيم
كملوا جميلكم وماتحموش الثورة كمان  وإحنا نحميها لأننا شباب الثورة العظيم برضه
ح نقضيها لجان شعبية.. بلا حوار.. بلا وفاق
أكتب كلامي هذا وأنا أستمع إلى أغنية ثورية في القناة الأولى اسمها (متشكرين يا جيشنا)
بس بلاش تردوا بـ (العفو)
والله الموفق

يا( وقيعة ) سودة

27 مايو

جمعة الغضب - جمعة تصحيح المسار - جمعة حماية الثورة

أو جمعة الوقيعة كما سماها الإخوان والمجلس العسكري

مش مهم الاسم المهم أنها كانت حاشدة.. أعطت إحساس جميل بالأمل والثقة

(الجدع جدع، والإخوان إخوان)

إحنا اللي إدينا الإخوان حجم أكبر مما يستحقون.. عارفين إن عددهم كبير لكن أن يظهر أن هذا العدد الضخم لم يؤثر في حشد الناس

 اسكندرية

التحرير

رغم دعوات التكفير وإتهام الناس بالعلمانية والشيوعية تمامًا كما عوملوا من قبل كل الأنظمة السابقة
المهم إن الإخوان همة الإخوان.. نفس الغباء والعنجهية.. باعوا الشارع قبل أن يضمنوا السلطة
وفي إتجاه غريب جدًا إنهم يكونوا مجتمع مستقل بيهم ومنفصل عن باقي المجتمع المصري.. منتهى التعالي والعنصرية
الفقيه الدستوري صبحي صالح اللي ربنا فتح عليه بيقولك محدش فلوطة ييجي يقولي أتجوز واحدة مش من الأخوات.. عايز إخوانجي يتجوز إخوانجية علشان يجيبوا إخوانيين صغيرين

(نزلوا بالدبدبات وعملوا حصر تجول)

المجلس بأة أعتقد أن صدمته كانت أكبر من صدمة الإخوان
أسلوب (مش لاعب) اللي استخدموه في البيان رقم 58 وإعطاؤهم إشارتين (تهديد للثوار) و (ضوء أخضر للبلطجية)
لكن الظاهر إن البلطجية عاندوا المجلس كما عاندهم الثوار بالظبط.. يعني الجيش يقول مش حاميكوا يقوم البلطجية يكبروا دماغهم وياخدوا يوم الجمعة إجازة

انسحاب الجيش  فكرني بعبارة دمها خفيف
(نزلوا بالدبدبات وعملوا حصر تجول) 
فض اعتصامات بالقوة ورصاص حى وحموا السفارة اللي في العمارة لكن حماية الثوار مش لاعب
ومن هتافات الثوار أمام المنطقة الشمالية العسكرية في اسكندرية
(الحارس الله والصلاة على النبي)


اليوم عدى على خير وبنجاح ساحق
أولا: المجلس عرف وتأكد إن اللف والدوران مش ح يجيب نتيجة معانا.. يعني لا شرطة عسكرية تضرب نار ح تخوفنا
ولا إنسحاب من تأمين المظاهرات ح يرجعنا
من الآخر.. إحنا الشعب.. إحنا الثورة
فاستهدوا بالله وكملوا دوركم في خدمتنا وخدمة الثورة زى ما إحنا عايزين علشان تعدي على خير
الشارع لينا وبتاعنا.. نقدر نحشد بعون الله مليونيات ومن غير إخوانجية
ثانيًا: الإخوان عرفوا حجمنا وإحنا عرفنا حجمهم.. ده غير إنهم اكتسبوا عداء الشعب زى ما يكونوا الحزب الوطني بالظبط
لأ وإيه من غير ما يحكموا.. ما شاء الله متفوقين من يومهم.. الناس هتفت ضدهم قبل ما يبقوا حكومة
شئ يحسب لفصيل سياسي بقاله 83 سنة محظور أو محصور اللي يعجبك
ثالثًا: استخدام خطاب التكفير برضه مش هيجي معانا .. العلمانيين طلعوا بيصلوا زى الناس أهو

التحرير

القائد إبراهيم

تحضير الحصير لصلاة الجمعة

رابعًا: الإعلام مفيش منه رجاء غير بالتطهير بميدات حشرية.. وينافس الإعلام المصري الإعلام الإخوانجي

 

دي بأة المظاهرة اللي الإخوان كانوا بيقولوا عليها مئات 

اسكندرية

أحب في الآخر بس أقول 
الوقيعة دي تبقى خالتك زى الفئوية بالظبط

الحامي ربنا

مش جديدة
بس حتى المرة دي مقدرتوش تقولوا حياد.. لأن أنتوا خليتونا مننا للبلطجية 
وأنا أعتبر هذا البيان تحريض رسمي على الثوار وعلى مهاجمتهم.. إيه يعني يا ننزل على ركبنا يا (احموا نفسكوا)
أوعوا تفتكروا إن أنتوا اللي حميتونا في الأول .. الحامي هو ربنا يحمينا منكم ومن بلطجية النظام اللي بدأوا الهجوم على الاقسام النهاردة استعدادا للهجوم على أشرف وأنبل وأطهر من أنجبت مصر
دي بلادنا ولازم تمشي زى ما أحنا عايزين
في ناس بتقول كويس إن الجيش مش ح يكون موجود علشان محدش يحتك بيه.. طبعا كلام مش منطقي لأن الجيش لو عايز يأمن الناس ح يقدر ولكم في فض الاعتصامات بالشرطة العسكرية عبرة.. بدل ما يستخدموا العنف ضد المتظاهرين يورونا الجدعنة أدام البلطجة
لو حدث أى تجاوز أو إصابة لأى شاب بكرة لازم محامين يقدموا بلاغات بتواطؤ المجلس وتحريضه هو والأخوان المسلمين على الهجوم علينا

بالنسبة بأة للأخوان فده برضه مش جديد عليكوا.. طول عمركوا واطيين ومعندكوش أصل
وأنا ح أقف أدام ربنا أطلب منه القصاص منكم للافتراء علينا.. أنتوا السبب في أن الناس بتخاف من الإسلام ومن الشريعة
أنتوا السبب في نكسة الثورة اللي بتحصل دلوقتي.. وح تكونوا أول ناس يتم التضحية بيها من رموز السلطة كالعادة
أنتوا بتلبسوا مصر كلها في حيطة.. 
احنا لا علمانيين ولا شيوعيين ولا ملحدين.. ده على أساس أصلا أنكم تعرفوا الفرق بين التلاتة
إحنا اللي سيبتونا يوم 25 يناير ورفعتوا مطالب الإصلاح للنظام البائد علشان تكسبوا نقطة عنده
وأنتوا اللي بتحاولوا تكسبوا نقطة عند المجلس دلوقتي
لا يهمكوا مصر ولا يهمكوا شعب.. أنتم مجرد دمى تتحرك بزمبلك المصالح الضيقة..
احنا السبب بعد ربنا إن أنتوا دلوقتي مش محظورين .. عندكم حزب.. وعندكم فقيه دستوري.. وعندكم دستور تطبخوه على مزاجكم
براجماتيين نفعيين وح تفضلوا طول عمركم كده ومفيش أمل فيكم
يا بتوع اختبار الديمقراطية.. 
انتوا الملحق اللي في ثورتنا