الحوار الوطني.. ويك ويك ويك
يا ولول كذا ويا ولول كذا ويا ولول كذا
المجلس ربنا يجازيه خير عن حماية الثورة (متضحكش)، لما لقى الناس مش طمران فيها الصور والدبابات
عملنا حوار وطني ووفاق قومي
أى نعم أنا معرفش الفرق بين الاتنين بس اسم الوفاق الوطني ده يخض
يحسسك كده بمجلس الأمن، الأمم المتحدة، وزارة الداخلية.. حاجة تشرح القلب يعني
الحوار الوطني ده أكيد ح يضم (وطنيين).. الوطنيين مكدبوش خبر.. راحوا حجزوا الكراسي ولزقوا فيها زى عادتهم
الشباب يهشوا فيهم.. أبدًا، يزعقوا معاهم.. أبدًا، تقولش لازم الكراسي تكون تيفال علشان ميلزقوش
الحوار ده بأة المفروض يكون حوار بين طرفين أو أكثر.. ولازم المجلس العسكري الحاكم يكون طرف فيه
أمال إحنا ح نقعد نتكلم مع بعض ولو حصلت المعجزة واتفقنا على مطالب ح نروح بالمطالب دي فيه.. كوالالامبور مثلا
ما هو لازم المجلس يشوف هذه المطالب.. أو يسمعها.. أو حد يقراهاله طيب.. ياخد بيها خبر حتى
ما علينا.. نتكلم وبعدين نبقى نبعت المطالب المتفق عليها (لو حصل واتفقنا) بالإيميل
والمجلس يرد علينا ببيان فيس بوك محترم كالعادة
والله الموفق
هو الحوار شغال بقاله أد إيييييييييه؟ خمس ست أيام
الناس قاعدة .. طالع عينها تتعارك، وتشتم، ويتقطع عليهم البث، ويزعقوا ويصرخوا، يعني حوار حوار يعني
تعب قلب.. يقوم يطلع قرارين من المجلس
الأول: قانون مباشرة الحقوق السياسية
الثاني: قانون انتخابات مجلس الشعب
طب والحوار؟؟
الناس دي شغالة مكلمة.. ولا خرس في بلد طرش؟؟ ولا إيه بالظبط
وعلى رأى بوحة المواطن المصري المطحون (ويك ويك ويك، يا ولول كذا ويا ولول كذا)
ده أنتوا لميتوا معاشات الوزارة والحزب الوطني كله في الحوار.. يعني الشباب ح يحتاجوا يتعالجوا بعد الحوار مايخلص على نفقة الدولة
ولا هو حرق دم على الفاضي
يا مجلس.. يا مجلس.. يا مجلس أنا بأكتب وأنا بأدوس على ضروسي.. أنتوا بتحموا الثورة بنَص كلامكم.. مش بتقودوا الثورة ولا بتحكموا الثورة
دي مش يوليو.. دي يناير
الفرق هو كالفرق بين الأرض والسما، بين البركة والمحيط، بين الصحرا والمرج
ده حتى يوليو كان فيه قرارات ثورية..
الحوار الوطني ولا الوفاق القومي، ولا البدنجان المقلي لازمته إيه؟
يعني نضرب دماغنا في حيطة.. أنتوا مش قلتوا مش ح تحموا المظاهرات وإحنا نحمي نفسنا لأننا شباب الثورة العظيم
كملوا جميلكم وماتحموش الثورة كمان وإحنا نحميها لأننا شباب الثورة العظيم برضه
ح نقضيها لجان شعبية.. بلا حوار.. بلا وفاق
أكتب كلامي هذا وأنا أستمع إلى أغنية ثورية في القناة الأولى اسمها (متشكرين يا جيشنا)
بس بلاش تردوا بـ (العفو)
والله الموفق
ليست هناك تعليقات:
إرسال تعليق