كيف تٌفشل ثورتك في 7 خطوات

 

1. بعد تنحي الرئيس أو خلعه أو هروبه.. اعمل مهرجان ضخم للاحتفال في الشارع.. امسك العلم وشغل أغاني وطنية وماتفكرش مين اللي بيحكم دلوقتي.

2. لا تنسى الجمايل.. يعني الــــ... أى حاجة والشعب وأنت إيد واحدة.. وتختلف المسميات باختلاف الدولة..

3. طبعا ضمنيا ح تكون فضيت اعتصامك.. ارجع بشياكة ونضف الميدان.. وح تلاقي بعدها الفكرة مخمخت في دماغ الحزب اللي كان حاكم وبدأ ينفذها وبكده يبقى حزب الثورة.

4. أهم حاجة إن الأجندات تخرج دلوقتي.. كل واحد له أجندة مخبيها يطلعها.. التورتة لسة ماستوتش لكن ينفع تتاكل نص سوا.. وشباب الثورة خلوهم يولعوا لأنهم من غير أجندة.. الأغبيا كانوا بيكتبوا على الوول.

5. لو فيه دين تاني في البلد غتت على أصحابه.. ومفيش مانع من هدم دار عبادة أو قطع مناخير واحد شكله مش عاجبك..

وابعت شيخ وقسيس يعملوا مجلس عرفي علشان يصالحوهم عافية.. بلا قانون بلا وجع دماغ

6. سيبك من مرشحي الرئاسة وامسك بإيدك وسنانك في مرشح جامعة الدول العربية..

7. وأهم مبدأ مفيش حاجة اسمها تغيير لكن في إصلاح وتأديب وسجن للمدونين وربنا يستر.

وأخيرا اعرف أن الدستور لا يضعه الشعوب بل أن الشعوب يضعها الدستور ورئيس الجمهورية المنتخب النزيه اللي ح ييجي بانتخابات شفافة زى ورقة السيجارة من خلال غزوة صناديق حرة ديمقراطية.